“إيناس الداودي” و رحلة احترافها في مجال التعليق الصوتي

النجاح عمره ما كان سهل الوصول ليه لـكن لو حاولت وسعيت هتوصل وربنا هيكون معاك خطوة بخطوة.💙

كتبت – رنا رجب

انهاردة هنعرف دا مع بعض من خلال قصة نجاح بطلتنا “إيناس الداودي” اللي بالمناسبة حاليًا هي أصبحت مدربة وبتساعد المعلقيين الصوتيين يحترفوا التعليق الصوتي ويبدأوا أول شغل ليهم، يلا بينا نعرف قصتها وازاي وصلت للمكانة دي..

إيناس كانت بنت جميلة عندها طموح ولكن مش قادرة تعرف هي بتحب أي ولا عايزة تحقق أي فـ كانت بتخبط في كل مجال شوية بدون هدف..
لحد ما في يوم اتعرفت على بنت من السوشيال ميديا وكانت العلاقة بينهم عادية، بدأت البنت دي تدّخل إيناس في فرق تطوعية وهي مازالت مش قادرة تحدد بتعمل اي!

إيناس كان عندها مهارة إنها بتحب تتكلم زي المعلقيين الصوتيين لكن عمرها ما قرأت إن في مجال خاص بالتعليق الصوتي، دخلت أول فريق تطوعي وكانت فرد من لجنة السوشيال ميديا، طلبت منهم إنها تعمل فيديو عن الأهداف رغم إنها عمرها ما عرفت تحدد أهدافها، فعلاً سمعوا طريقة إلقائها ووافقوا على طلبها..

بدأت تبحث وتسمع فيديوهات على اليوتيوب، وقعدت تكتب اسكريبت الفيديو من وحي خيالها وطلبت من بنت تعملها المونتاچ، لما سمعت الفيديو بعد ما خلصت اتفاجئت بصوتها وطريقة إلقائها الجميلة، بدأت تهتم وتدور في المجال دا علشان تعرف عنه اكتر وعرفت إنه مجال اسمه “التعليق الصوتي”..

بَحثت إيناس على جروبات خاصة بالمجال وانضمت ليهم ولكن لما سمعت أصوات الناس وأد اي حلوة قالت لنفسها انا مستحيل أوصل لكدا في يوم وبدأت تيأس، للأسف استسلمت وقالت أنا خامت صوتي ضعيفة مش هوصل، فضلت سنة كاملة بعيدة عن المجال..

بعدها قررت تتغلب على خوفها ورجعت من تاني وبدأت تحضر سيشنز ومحاضرات مع مدربين كتير، وأخدت تدريبات كتير واكتشفت إن ادائها عظيم جدًا ومخارج الألفاظ عندها صحيحة ودا يرجع لكونها خاتمة القرآن الكريم بالقراءات وبالتجويد..

من هنا إيناس بدأت تشتغل على هدفها آخيرًا وتثبت نفسها في المجال لحد ما مستواها اتحسن، بقت مسئولة عن اكتر من راديو وعملت اتفاقيات إنها تقدم كورسات في وزارة الشباب والرياضة، وأصبحت سفيرة معاهم في أحد البرامج، وصلت إنها بقت مدربة في شركة “المدرب الأفضل” واكتر من مكان تاني.

آخيرًا اوعىٰ تستسلم، طبيعي إنك تفضل فترة طويلة مش قادر تحدد هدفك بس الأهم إنك تحاول تكتشف نفسك زي ما “إيناس” عملت ووصلت لأنها وثقت في ربنا وفي نفسها وكمان لو انت حابب تبدأ في المجال تقدر تتواصل مع بطلتنا وهتكون معاك وهَتعرفك كل اسرار المجال.