دليلك الشامل في مجال الديجيتال ماركتنج.. تبدأ ازاي وتشتغل ايه وتقبض كام؟
المقال دا لكل حد عاوز يبدأ في مجال الـ Digital Marketing ومش عارف يبدأ إزاي ويتعلم إيه ويشتغل بعدها إزاي.
______________
إيه هو الديجيتال ماركتينج ببساطة؟
– هو تسويق أي حاجه (خدمة أو منتج أو شركة.. إلخ) عن طريق الإنترنت
– الديجيتال ماركتينج هو الـ Umbrella الكبيرة اللي بتضم أقسام كتير جدا من التسويق من خلال الإنترنت
وإيه هى أقسام الديجيتال ماركتينج؟
– Social Media Marketing (SMM)
وده يعني التسويق عن طريق منصات أو الـ Platforms الخاصة بمواقع التواصل الإجتماعي زي (فيسبوك وإنستجرام وتويتر وسناب شات ولينكد إن.. إلخ)
-Search engine marketing (SEM)
وهو ببساطة إنك بتسوق شغلك عن طريق اعلانات جوجل سواء كانت الاعلانات هتظهر على ويب سايت او يويتوب او حتى اعلان في جوجل سيرش عن طريق Google Adword والمعروف حاليا بـ Google Ads ودي زي منصه عاملاها جوجل لأصحاب الأعمال اللي حابين يعملوا اعلانات مع جوجل لشغلهم
Branding:
إنك بتعمل إسم أو بتشهر شركة أو مكان معين أو أي حاجه بتتقدم وتخلي ليها قاعدة جماهيريه عندها ولاء ليها، البراندينج له أكتر من طريقه وأولها إنك بتختار ألوان معينه لشركتك ولوجو وسلوجان وبتختار القيمة اللي هتديها لجماهيرك عشان يكون عندهم ولاء ليك مش مجرد إنك بتسوق لمنتج أو خدمة، إنت كمان لازم تقدملهم قيمة أو تعلمهم حاجه أو تقدملهم معلومة وهى ما يطلق عليها قيمة أو Value
-Search Engine Optimization (SEO)
تحسين أو تهيئة محركات البحث.. يعني إيه؟
يعني لما تيجي تعمل سيرش بإسم أي حاجه على جوجل بتلاقي مواقع معينة طالعه أول نتايج في السيرش اللي انت عملته المواقع دي بتهيئ نفسها عن طريق كلمات مفتاحيه مميزه ومحتوى مميز يخليها تظهر رقم واحد في السيرش لما انت تعمل سيرش.
-Content Marketing (CM)
وده كتابة المحتوى وبينقسم لجزئين فيه ناس بتكتب محتوى للسوشيال ميديا بس يعني دوره يشتغل كتابة محتوى على السوشيال ميديا بس وفيه ناس بتشتغل Content Creators أو كُتاب محتوى على بلوج أو ويب سايت والمحتوى طبعا بيكون طبقا لخطة واستراتيجية محطوطه للمنصه اللي هو بيشتغل عليها والمنتج او الخدمة
-E-mail Marketing:
وده التسويق عن طريق الإيميل، لما بتسجل دخول في أي موقع مش دايما بيجيلك ايميلات بكل حركه او اكشن عملتها على الموقع ده زي فيسبوك مثلا لما بتضيف حد او بتكتب بوست او حد بيبعتلك ادد او بيعملك كومنت، ده التسويق عن طريق الإيميل
Copywriting:
كتابة الإعلانات، وده بيحتاج إنك تكون بتعرف تكتب سيناريو وشخص بتفكر ومبدع عشان الفكرة والصياغه هما اهم حاجه في المجال ده بعد ما تتعلم أسس الماركتينج
دي ببساطة مجالات الديجيتال ماركتينج
يلا بينا ندخل على وظايف الديجيتال الماركتينج واسم ووظيفه كل وظيفه؟
يلا بينا.
إيه هى وظايف الديجيتال ماركتينج؟
-Social Media intern
وده الشخص اللي بيكون عنده باكجراوند في السوشيال ميديا الماركتينج او معندوش وحابب يتعلم فهيلاقي شركات كتير بتقدم Internships أو تدريب في المجال، فيه شركات بتقدم ده بمقابل مادي وفيه شركات لا، بس صدقني في الأول مش مهم الفلوس على قد ما مهم تتعلم وتجمع خبره، وفي التدريب ده هتتعلم كل حاجه وهتشتغل كل حاجه فمفيش وظيفه محدده ليك تعملها في التدريب
-Social Media Junior
وده بيكون شخص عنده خبره من 0 سنه لحد سنه في مجال السوشيال ميديا ماركتينج وبيكون لسه في البداية وبيشتغل وسط تيم
-Social Media Specialist
وده بيكون الليفل الأوسط من الخبره في مجال السوشيال ميديا ماركتينج من سنه لحوالي 3 سنين
Social Media Moderator:
وده حد بتكون خبرته من 0 إلى ما لا نهاية بتكون كل شغلته إنه بيرد على المسدجات والكومنتات او التويتس على أي منصة سوشال ميديا
Social Media Ad Specialist:
وده حد بتكون خبرته بداية من سنتين وبتكون كل شغلانته إنه بيعمل إعلانات لمحتوى الشركة على السوشال ميديا
Social Media Executive:
وده الراجل اللي بيعمل كل حاجه بإيده وبيكون فوقيه مدير بيعلمه او بيديله تاسكات واكبر واكتر منه في الخبره
-Senior Social Media Specialist:
وده بيكون ليفل متقدم شويه في السوشيال ميديا ماركتينج وغالبا بيكون فيه حد بيشتغل معاه Junior او بيكون مشرف على تيم لكن مش مدير وخبرته بتبدأ من أكتر من 3 سنين لحد 5 سنين
-Social Media Manager\Director:
وده ليفل الوحش في السوشيال ميديا ماركتينج وده بتكون خبرته اكتر من 5 سنين وبيدير فريق كامل
intern\Junior\Senior Content Creator:
وده كاتب محتوى زي ما قولنا للسوشيال ميديا او المواقع او البلوجز سواء متدرب أو مبتدئ أو خبره وبيكون عنده خلفيه كبيره عن الماركتينج لإن ده الأساس بتاع شغله
Creative Director:
وده نفس ليفل الـ Manager بس ده خاص بالمحتوى والأفكار اكتر وساعات بيتسمى Manager يعني الـ Creative Director هو مدير فريق برضو بس فريق ناس من كاتبين المحتوى او كاتبين الإعلانات
Digital Marketing Junior\Specialist\Executive\Manager:
نفس سنين الخبره في الوظايف اللي فوق بالترتيب بس الفرق إن الـ Digital غير الـ Social زي ما قولنا فوق لإن الـ Social جزء من الـ Digital فاللي بيشتغل Digital بشكل كامل بيكون معاه جنب الـ Social الـ SEM والـ SEO والـ Email Marketing وغيرها على حسب المطلوب في الشركة اللي هو شغال معاها او فيها.
وكده ببساطة نكون لمينا مجال الديجيتال ماركتينج او على الأقل أغلبه ببساطة.
متوسط رواتب مجال الديجيتال ماركتنج:
1- خبرة من 0 : 2 سنة براتب 7,000 جنية
2- خبرة من 2 : 5 سنة براتب 9,500 جنية
3- خبرة من 5 : 10 سنة براتب 12,500 جنية.
كتب – روضة عارف
