ببحث سريع وبسيط على موقع لينكدإن هتلاقي ان فيه أكتر من 16 ألف شخص في مصر بيشتغل في التسويق بالمحتوى!
والبحث عن كلمة “التسويق بالمحتوى” في جوجل مصر هتلاقي ان فيه اكتر من 205 ألف نتيجة بحث لصفحة ويب تحتوي على كلمة التسويق بالمحتوى على بعضها.
ملحوظة: لو شلت علامات التنصيص هتلاقي عدد النتائج اكتر من 25 مليون صفحة ويب فيها كلمة التسويق وكلمة المحتوى مع بعض.الأرقام دى كل يوم بتزيد عن اليوم اللي قبله نتيجة وعي الشركات بأهمية التسويق بالمحتوى كاستراتيجية أساسية لجذب العملاء المهتمين بالمنتجات والخدمات اللي اللي الشركات دى بتقدمها.
بالإضافة إلى أن التسويق بالمحتوى من أكتر مجالات العمل طلبا في سوق الفرى لانس، وكمان فلوسه حلوة مقارنة بباقي المجالات بشرط تكون محترف!
بس مش كل الناس فاهمة المجال ده صح، وبالتالي مش كل الناس بتعرف تجيب شغل فيه بالمرتب اللي هي عايزه!
وكمان كتير من الشركات اللي بتحاول تعتمد عليه بتكون فاهمة الموضوع غلط خالص!
وهنا يجي دور المقال ده!
فيه 3 مفاهيم غلط عن التسويق بالمحتوى هي السبب الرئيسي اللي بيخلي أدائك مش على المستوى المطلوب!
لو مقتنع بأي مفهوم من الـ 3 مفاهيم اللي هاقولها هنا لازم تستبدل قناعتك دي بالقناعات الصح.
اتفقنا؟
يلا نبدأ …
1- التسويق بالمحتوى مش مناسب لمجال كذا
لو انت من الناس اللي بتقول كده، فأحب أقولك ده مش صحيح!
التسويق بالمحتوى ينفع لكل المجالات وكل الأسواق.
التسويق بالمحتوى بيتم تنفيذه عن طريق إنشاء محتوى ذو قيمة بيحل المشاكل اللي بتواجه الجمهور المستهدف.
مهما كان المجال بتاعك رخم أو صعب، حدد الجمهور المستهدف واعرف وافهم المشاكل اللي بيواجهها، واعمل لهم محتوى فيه حلول للمشاكل دى، وانت هتبطل تقول المجال الفلاني رخم!
انت ممكن تقول انا مش عارف أطبق على المجال اللي انا شغال فيه، وساعتها نتكلم واساعدك.
إنما تقول إن التسويق بالمحتوى مش مناسب لمجال كذا، أروح فيك في داهية على طول!
2- الناس ما بتقراش
مين قال؟
Sponserd Ads
الناس بتقرا، وبتقرا دلوقتي اكتر من اي وقت فات!
إحنا في عصر جوجل يا برنس، اي حد عايز يشتري أو يعرف حاجة بيدخل يكتب اللي في دماغه في جوجل.
الناس بتقرا، والناس بتسمع، والناس بتتفرج، اعمل انت بس محتوى مهم، واعمله له تسويق وملكش دعوة.
3- الموضوع بياخد وقت كبير
انا معاك انه بياخد وقت (مش كبير على فكرة)، بس تعالي أقولك حاجة مهمة جدا …
البيزنس علشان يكسب أو يزود الربحية قدامه خمس طرق مفيش غيرهم:
1- زيادة عدد العملاء
2- زيادة حجم التعامل مع كل عميل
3- زيادة عدد التعاملات لكل عميل
4- زيادة السعر
5- تقليل التكلفة
لو قررت تزود السعر، أو تقلل التكلفة هتقع في مشاكل كبيرة ممكن تسبب لك للبزنس دوشة مايقومش منها بسهولة.
يعني من الأخر مش قدامك غير طريقة من أول 3 طرق.
الطريقة التقليدية لزيادة عدد العملاء أو حجم التعامل أو عدد التعاملات مع طول عميل هي الظهور كتير للناس بالمنتج أو الخدمة اللي الشركة بتقدمها!
الطريقة دى كويسة وفعلا بتشتغل ولكن يا دوبك اللى هتدفعه هتلمه او هتكسب مبلغ بسيط، ومع تقدم الوقت المبيعات هتقل، وتبتدى تسأل نفسك هو انا مبيعاتي قلت ليه!
فتبدأ تدفع اكتر فتكسب أكتر شوية، فتدفع اكتر، وحلقة مقفولة!
البديل؟
أكسب ثقة الزبون، وخليه يرشحك لصحابه عن طريق إنك تتكلم معاه وتشوف مشاكله وتحاول تحلها بالمحتوى.
ملحوظة: انا مش ضد الاعلانات، الصح هو التكامل ما بين ده وده.
التسويق بالمحتوى حجر أساس لأي بيزنس عبر الانترنت!
